सुनसरीको धरानमा जारी चौथो स्व. बिक्रम राई स्मृति भेट्रान फुटबल प्रतियोगितामा आज भएको अन्तिम क्वाटरफाईनल खेलमा काकडभिट्टा भेट्रान फुटबल क्लब झापालाई हराउदै दमक लखनपुर भेट्रान फुटबल क्लब सेमिफाइनल प्रबेश गरेको छ ।
धरान १६ स्थित प्रस्तावित क्षेत्रीय रंगशालामा दिउँसो ४ बजेर ४४ मिनेटमा सुरु भएको खेलमा दमक लखनपुरले काकडभिट्टालाई १-० गोलले हराउदै सेमिफाइनल यात्रा तय गरेको हो । निकै नै प्रतिस्पर्धात्मक खेलमा दमक लखनपुर भेट्रान फुटबल क्लबका जर्सी न १० का सुबास हाङ्ग्थुपो लिम्बुले गरेको गोल नै जितका लागि निर्णायक भएको थियो । जहाँ लिम्बुले खेलको दोस्रो हाफको ९ औ मिनेटमा गोल गरेका थिए ।
आजको खेलको म्यान अफ द म्याच दमक लखनपुर भेट्रानका जर्सी १० का सुबास हाङ्ग्थुपो लिम्बु नै घोषित हुँदै नगद २१ सय र मेडल प्राप्त गरेका छन ।
भोलिको पहिलो सेमिफाइनल खेल रारा भेट्रान फुटबल क्लब धनकुटा र हाम्रो भेट्रान फुटबल क्लब धरान बिच हुनेछ भने दोस्रो तथा अन्तिम सेमिफाइनल खेल दमक लखनपुर भेट्रान फुटबल क्लब र आयोजक धरान भेट्रान फुटबल क्लबका बिच हुने आयोजकले जनाएको छ ।